Woensdag

Die Here het vir my sonskyn gestuur vanoggend
na ‘n paar dae van bewolktheid.
Moenie my verkeerd verstaan nie
ek is dankbaar vir die reën.
Maar gister het ek iets gelos
iets wat my gewurg het
iets wat die lewe uit my gehaal het
iets wat my moedeloos
en huilerig gemaak het.

En vandag skyn die son
en ek voel vry.

Advertisements

‘n Liefdesbrief vir my duif

Jy’t my kom haal in Bloemfontein
my met bagasie kom wegneem
jy’t my gedra kaalbas oor die vlakte
en gelag vir die verlede

Jyt my beskerm en gesê
ek moet na jou hartklop luister
jy’t my gesoen
en die seer van my verlede ingeasem

Jy’t my trane afgevee en
geduldig geluister
jy’t die kombers saggies
om my siel gevou

En my styf vasgehou

 

Dankie.

Tula my Suster Tula

Jou huil word gesien
Jou moedhou gemeet
Jou dag al korter
Die seisoen al witter
Die nagte al langer

Tula my suster tula

Ek wil vir jou vertel
Dat die dag gou
Sy opwagting sal maak
Sy sonligstrale by jou
Venster sal ingooi en die
Water weer soet proe

Maar die wit woestyn
Is moeilik
En alleen
En uitmergelend
En daar is geen hoop

Maak dit net deur vandag,
Soveel keer al vir myself gefluister

Mense mag nie sien
Die swaarkry
Die nagte van om huil
Néé…

Tula my suster tula

Ek gaan jou vertel
Dat jy weer sal smile
Dat jy weer sal lag
En simpel wees
Die hoogtepunt van jou dag

Ek gaan jou vertel
Dit sal weer beter gaan
Die water weer soeter
Die son weer warm

Ek gaan jou vertel
dit sal weer beter gaan,
Dit sal
Wanneer weet ek nie.

Liela en die vrou

Die vrou het op Liela geskree
En die volgende dag het die vrou op Facebook gepost hoe #blessed sy is.

Liela kon nie verstaan
Hoekom die vrou op haar skree nie
‘n Wild vreemde vrou
‘n Vrou wat nie eers vir Liela ken nie.

Dis eers later
Dat Liela besef het die vrou het pyn.
Die feit dat die vrou met mense werk
beteken nie die vrou kan met mense werk nie.

Liela het besef dat almal seer ronddra, en die mense wat die toughste probeer voorkom, die meeste pyn het.

Die mense wat die hartste probeer skree is die mense:
Wat die meeste bagasie saamdra
Wat die minste vergewe
Wat die minste luister
Wat die meeste dink hulle is reg

Liela probeer vergeet van die vrou
Maar Liela kan nie.

didi-se-dorings---lielaFoto krediet

Fringe

My ouma het gesê: ek moet ‘n fringe dra, want my voorkop is groot.

Fringe dra is nie vir my nie.
Fringe dra het maak dat ‘n st.4 onderwyser my fringe met ‘n toutjie vasgemaak het, en my so laat rondloop het die res van die dag (pouse ingesluit).

Fringe dra is makliker in Durban, waar jou hare vinniger groei.

Fringe dra is vir hare maar nie vir almal nie.

Maak ‘n kopskuif